Thoda thoda dard bacha tha,phir se tum muskaye kyun?
Phirse jeena seekh rahi thi,tum phir se paas aaye kyun?
Mujhe pata main kathputli hoon,mann pathar mein badal diya,
Pathar mein phir pran phoonkne… phir se khel rachaye kyun?
Ek baar tum tod chuke ho,mann ki partein khol chuke ho
Seedhi sachi choti si ye baat samajh na aaye kyun?
Kyun aatur mann tumhe dekhne,kar bechaare kayin bahaane
Raah mein teri bicchh jaata hai…chot maangta hi rehta hai?
Dhoop ko,baarish ki boondon ko taras gayi thi
Bas khidki se jeevan behta dekh rahi thi,bandhi hui thi…
Ab jab jaana,peeche mudkar aankhen geeli mat kar lena!
Sab Natak hai! Peeche mud kar phir se waapas mat aajaana…
Sirf naam ko,saath khade hone ke liye , mat aana tum…
Naye mitr , kuch choti khushiyan-main jee loongi jee bhar kar!
Nayi kahani ban jayegi,naye paatr main gadh loongi ji
Indradhanush ke rangon se main phir bhar loongi apna ghar!
No comments:
Post a Comment